Ֆինլանդիայի նախագահ Ալեքսանդր Ստուբը և Նորվեգիայի վարչապետ Յոնաս Գահր Ստյորեն աջակցություն են հայտնել Դանիային՝ պաշտպանական նպատակներով Գրենլանդիան վերահսկելու ԱՄՆ սպառնալիքների ֆոնին։
Ավելի վաղ ԱՄՆ նախագահ Դոնալդ Թրամփը հայտարարել էր, որ Միացյալ Նահանգներին Գրենլանդիայի վերահսկողությունը անհրաժեշտ է պաշտպանական նպատակներով։
«Մեզ անպայման անհրաժեշտ է Գրենլանդիան։ Մեզ դա անհրաժեշտ է պաշտպանության համար», - ասել է նա The Atlantic-ին տված հարցազրույցում։
Թրամփը համոզված է, որ կղզին, որը Դանիայի ինքնավար տարածք է, «շրջապատված է ռուսական և չինական նավերով»։
Դանիայի վարչապետ Մետտե Ֆրեդերիկսենն իր հերթին ընդգծել է, որ Գրենլանդիան թագավորության մաս է կազմում և կոչ է արել Միացյալ Նահանգներին դադարեցնել սպառնալիքները՝ ընդգծելով, որ Վաշինգտոնի կողմից կղզու վերահսկողությունը ստանձնելու իմաստ չկա։
«Գրենլանդիան Դանիայի Թագավորության անբաժանելի մասն է։ Նորվեգիան լիակատար համերաշխություն է հայտնում Թագավորությանը», - գրել է Ստյորեն իր սոցիալական ցանցերի էջում։
