Հնդկաստանի Օդիշա նահանգի բնակիչը գնացել է բանկ՝ իր մահացած քրոջ մնացորդներով, փորձելով ապացուցել նրա մահը և նրա հաշվից 20,000 ռուփի (մոտավորապես 210 դոլար) հանել, հաղորդում է India Today ամսագիրը։
Կինը մահացել է երկու ամիս առաջ հիվանդության պատճառով, և անասունների վաճառքից վաստակած գումարը մնացել է նրա հաշվին՝ տեղական բանկում։ Տղամարդը նախկինում այցելել էր մասնաճյուղ, բայց աշխատակիցները պահանջել էին փաստաթղթեր, որոնք նա չէր կարողացել տրամադրել իր անգրագիտության պատճառով։
«Ես մի քանի անգամ այցելել եմ բանկ, և նրանք ինձ ասել են, որ բերեմ հաշվի տիրոջը՝ նրա անունով գումար հանելու համար։ Ես ասել եմ, որ նա մահացած է, բայց նրանք անտեսել են ինձ և պնդել, որ ես նրան բերեմ բանկ։ Հուսահատությունից դրդված՝ ես փորեցի գերեզմանը և վերցրի նրա կմախքը՝ որպես մահվան ապացույց», – հրատարակությանը պատմել է 50-ամյա Ջիտու Մունդան։
Դեպքի վայր ժամանած ոստիկանները վստահեցրել են տղամարդուն, որ կօգնեն նրան վերադարձնել գումարը։ Ըստ India Today-ի՝ կնոջ կմախքը հետագայում վերաթաղվել է իրավապահ մարմինների աշխատակիցների ներկայությամբ։
Տեղական իշխանությունները հրամայել են բանկին կազմակերպել միջոցների հնարավորինս շուտ տրամադրումը, քանի որ Ջիտու Մունդան մնում է իր հանգուցյալ քրոջ ակտիվների միակ օրինական պահանջատերը, հաղորդում է ամսագիրը։
