Գրենլանդիայի վարչապետ Յենս-Ֆրեդերիկ Նիլսենը, ի պատասխան ԱՄՆ նախագահ Դոնալդ Թրամփի՝ կղզու նկատմամբ հավակնությունների, հայտարարել է, որ գրենլանդացիները բաց են երկխոսության համար՝ ընդգծելով, որ հաղորդակցությունը պետք է տեղի ունենա ճիշտ ուղիներով։
Վենեսուելայի գործողությունից հետո Թրամփը հունվարի 4-ին Atlantic-ին տված հարցազրույցում հայտարարել է, որ Միացյալ Նահանգներին նույնպես Գրենլանդիան է պետք, քանի որ դանիական կղզին, ենթադրաբար, շրջապատված է չինական և ռուսական նավերով։ Դրանից հետո Դանիայի վարչապետ Մետտե Ֆրեդերիկսենը կոչ է արել Թրամփին դադարեցնել Գրենլանդիան անեքսիայի ենթարկելու սպառնալիքները։
«Մենք բաց ենք երկխոսության համար։ Մենք բաց ենք հաղորդակցության համար։ Բայց դա պետք է տեղի ունենա ճիշտ ուղիներով և միջազգային իրավունքը հարգելով»։
Վարչապետը շեշտել է, որ Գրենլանդիան Միացյալ Նահանգների մտերիմ և հավատարիմ ընկերն է եղել բազմաթիվ սերունդներ շարունակ, և այդ պատճառով Վաշինգտոնի ներկայիս, բազմիցս կրկնվող հռետորաբանությունը բացարձակապես անընդունելի է։
