Լիբանանի զինված ուժերն ամրապնդում են իրենց դիրքերը երկրի հարավում՝ կապված տվյալ հատվածում լարված իրադրության հետ, այդ մասին հաղորդել է LBCI հեռուստառադիոալիքը:
Լիբանանյան հրամանատարության վարկածով՝ ռազմական ներկայության ուժեղացման որոշումը բացատրվում է այն բանով, որ «Իսրայելը շարունակում է խախտել հրադադարի համաձայնագիրը, գրոհել Լիբանանի ինքնիշխանության և նրա քաղաքացիների վրա»։
Միևնույն ժամանակ՝ բանակի հրամանատարությունը՝ Լիբանանում ՄԱԿ-ի ժամանակավոր ուժերի (UNIFIL) և Իսրայելի ու «Հեզբոլլահ» շարժման միջև հրադադարի համաձայնագրի կնքումից հետո ստեղծված հանձնաժողովի հետ համակարգմամբ, շարունակում է հետևել հրադադարի պահպանման ռեժիմին:Մինչդեռ, ըստ The Times of Israel-ի, UNIFIL-ը հայտարարել է, որ իսրայելական զորքերը շարունակում են հարվածներ հասցնել Լիբանանի հարավում, և դա հակասում է ՄԱԿ-ի Անվտանգության խորհրդի 1701 բանաձևին։
«UNIFIL-ը շարունակում է կոչ անել, որ Իսրայելի պաշտպանության բանակը ժամանակին դուրս բերվի, և Լիբանանի հարավում տեղակայվեն երկրի զինված ուժերը («Հեզբոլլահ»-ի փոխարեն)», - հրատարակությունը մեջբերել է հատված UNIFIL-ի հայտարարությունից:
Իրենց հերթին Իսրայելի զինվորականները հայտարարել են, որ կուսումնասիրեն UNIFIL-ի քննադատությունը, սակայն հրաժարվել են հետագա մեկնաբանություններից: Նոյեմբերի 27-ին Իսրայելի զինվորականները և «Հեզբոլլահ»-ը դադարեցրել են ռազմական գործողությունները։
Հրադադարի համաձայնագրի պայմանների համաձայն՝ իսրայելական բանակը փուլ առ փուլ դուրս կգա լիբանանյան տարածքից և իրեն իրավունք է վերապահում հարվածներ հասցնել «Հեզբոլլահ»-ի մարտիկներին, եթե որոշի, որ նրանք սպառնալիք են ներկայացնում Իսրայելի անվտանգության համար։
Դրանից հետո հաղորդագրություններ են ստացվել Իսրայելի և «Հեզբոլլահ»-ի՝ միմյանց դիրքերին հարվածներ հասցնելու մասին:
