Իսրայելի վարչապետ Բենիամին Նեթանյահուն բանակցություններ է վարում Եգիպտոսի նախագահ Աբդել Ֆաթթահ աս-Սիսիի հետ՝ Գազայի հատվածին նվիրված գագաթնաժողովին Իսրայելի առաջնորդի հնարավոր մասնակցության վերաբերյալ, երկուշաբթի օրը հաղորդել է իսրայելական Ynet լրատվական կայքը։
«Վարչապետ Բենիամին Նեթանյահուն բանակցություններ է վարում Եգիպտոսի նախագահ Աբդել Ֆաթահ ալ-Սիսիի հետ՝ ԱՄՆ նախագահ Դոնալդ Թրամփի ներկայությամբ։ Օրակարգում է Նեթանյահուի մասնակցությունը Եգիպտոսում կայանալիք Շարմ էլ Շեյխի գագաթնաժողովին», - ասվում է հայտարարության մեջ։
Ավելի վաղ Axios պորտալը, հղում անելով ամերիկացի պաշտոնյայի, հայտնել էր, որ Նեթանյահուի մասնակցությունը սպասելի չէր։
Եգիպտոսի նախագահ Աբդել Ֆաթթահ աս-Սիսիի գրասենյակը հոկտեմբերի 11-ին հայտարարել է, որ Գազայի հատվածում պատերազմը դադարեցնելու նպատակով Եգիպտոսի Շարմ էլ Շեյխ քաղաքում գագաթնաժողովը տեղի կունենա երկուշաբթի՝ հոկտեմբերի 13-ին։
