Մեծ Բրիտանիայի նախկին վարչապետ Բորիս Ջոնսոնը և եվրոպական երկրների մի շարք պաշտոնյաներ գտնվել են այն տարածքում, որտեղ ռուսական ԱԹՍ-ն հարված է հասցրել ուկրաինա-լեհական սահմանին։ Այս մասին գրում է Der Spiegel-ը։
Ռուսական ԱԹՍ-ն հարվածել է Յագոդին-Դորոհուսկ սահմանային անցակետի շրջանին։ Հարվածի հետևանքով բեռնատարներ են այրվել, վնասվել է նաև ավտալցակայանի համալիրը։
Այդ պահին տարածքով հատուկ գնացքով անցել են Բորիս Ջոնսոնը, Գերմանիայի կանցլեր Ֆրիդրիխ Մերցի խորհրդական Զաուտերը, եվրոպական այլ կառավարությունների անվտանգության հարցերով խորհրդականներ և Բունդեսթագի պատգամավորներ։
ԱԹՍ-ի մասին նախազգուշացումից հետո գնացքը կանգնեցվել է։ Ուղեկցորդներն արթնացրել են ուղևորներին և պատրաստել հնարավոր տարհանման։ Որոշ ժամանակ անց տագնապը չեղարկվել է։
Գնացքի բոլոր ուղևորներն անվնաս են մնացել։
Հիշեցնենք, որ ավելի վաղ հրապարակվել էին ուկրաինա-լեհական սահմանային անցակետին հասցված հարվածի կադրերը։
Ուկրաինայի ԱԳ նախարար Անդրեյ Սիբիգան տեղի ունեցածն անվանել էր «պուտինյան ահաբեկչություն» և հայտարարել, որ ռուսական սպառնալիքն արդեն «թակում է ԵՄ-ի և ՆԱՏՕ-ի դռները»։
Նա գործընկերներին կոչ էր արել ուժեղացնել ճնշումը Ռուսաստանի նկատմամբ, սահմանել ամբողջական առևտրային էմբարգո, արգելել Ռուսաստանի քաղաքացիների մուտքը և խստացնել ռուսական ռազմարդյունաբերական համալիրի դեմ պատժամիջոցները։
Ավելի վաղ Լեհաստանի վարչապետ Դոնալդ Տուսկը հայտարարել էր, որ հետախուզությունից տեղեկություն է ստացել, ըստ որի՝ Ռուսաստանը հարվածներ է նախապատրաստում սահմանային անցակետերի ուղղությամբ։
Նշվում է, որ գնացքում եղել են նաև Գերմանիայի կանցլեր Ֆրիդրիխ Մերցի մերձավոր խորհրդականներից մեկը, ԵՄ մի շարք երկրների ազգային անվտանգության հարցերով խորհրդականներ, Գերմանիայի Բունդեսթագի պատգամավորներ, ինչպես նաև դիվանագետներ և գիտնականներ։
Տեղեկությունը գնացքում գտնված անձանց վերաբերյալ այս պահին պաշտոնապես հաստատված չէ։
