Կարճ տեսանյութերի TikTok ծառայությունը հնարավոր է՝ ստանա որոնման նոր գործառույթ, որը կօգտագործի գեներատիվ արհեստական բանականություն (ԱԲ): Գործառույթը կոչվում է Search Highlights և արդեն փորձարկվում է:
Ինչպես հայտնում է The Verge-ը, TikTok որոնման արդյունքների որոշ էջերի վերևում հայտնվում է ԱԲ-ի ստեղծած արդյունքների մի հատված։ Դրա վրա սեղմելու դեպքում նոր էջ է բացվում՝ ավելի երկար պատասխանով, որում նաև նշվում է, որ արդյունքները գեներացվել են ChatGPT-ի միջոցով, և որ TikTok-ը ցուցադրում է բովանդակություն «երբ ալգորիթմը համարում է, որ այն համապատասխանում է օգտատիրոջ որոնման հարցմանը»:
Առայժմ այս գործառույթը սահմանափակ է, և ոչ բոլոր հարցումներին ի պատասխան կարող են ստացվել ԱԲ-ի գեներացրած որոնման արդյունքներ:
Ինչպես ընդգծում է The Verge-ը, ծառայությունն արդեն ունի նմանատիպ գործառույթ, բայց դրա դեպքում չի նշվում, որ այն օգտագործում է ԱԲ և պարզ չէ, թե որտեղից է վերցվում այնտեղ տրամադրված տեղեկությունը: TikTok-ը դեռ չի պատասխանել այս հարցի վերաբերյալ մեկնաբանություն տալու՝ The Verge-ի հարցմանը։
Վերջերս որոշ օգտատերեր սկսել են վիդեո ծառայությունն օգտագործել որպես որոնման համակարգ։ Թվում է, թե TikTok-ի մշակողները փորձում են այնպես անել, որ օգտատերերն իսկապես կարողանան գտնել իրենց հարցերի պատասխանները հավելվածում։ Ավելին, TikTok-ը, կարծես, ԱԲ-ի որոնման արդյունքներում ավելացնում է հեղինակների բովանդակության վրա, որպեսզի լսարանին էլ ավելի հրապուրի՝ օգտվելու այս վիդեո ծառայությունից:
