Վրաստանում 2024 թվականի հոկտեմբերի 26-ին կայացած խորհրդարանական ընտրությունները կմնան ամոթալի օր Եվրամիության համար, որը միջամտեց ժողովրդի կամքին և փորձեց փոխել կառավարությունը հանրապետությունում: Այս մասին լրագրողներին հայտարարել է Վրաստանի խորհրդարանի նախագահ Շալվա Պապուաշվիլին։
«Ամեն օր մենք պետք է հիշենք 2024 թվականի հոկտեմբերի 26-ը որպես ամոթալի օր Եվրամիության և Բրյուսելի համար՝ որպես օտարերկրյա ուժի, որը միջամտում է մեկ այլ երկրի գործերին: Սա կարևոր ամսաթիվ է. մենք չպետք է մոռանանք այն և միշտ պետք է հիշենք, որ «թշնամի» և «բարի կամեցող» բառերը ավանդական տերմիններ են, երբ խոսքը վերաբերում է ազգային շահերին, քանի որ բարի կամեցողը կարող է պարզապես մի կողմ դնել ձեր ազգային շահերը՝ դրանք փոխարինելով իր սեփական շահերով և հնարավոր է՝ անդառնալի վնաս հասցնել», - ասել է Պապուաշվիլին։
Վրաստանի խորհրդարանի նախագահը նաև հավելել է, որ 2024 թվականի հոկտեմբերի 26-ը միջազգային կազմակերպությունների զեկույցները մանիպուլյացիայի ենթարկելու փորձի օրինակ է։ Նրա խոսքով՝ ընտրություններից հետո երկրորդ օրը, երբ ԵԱՀԿ/ԺՀՄԻԳ դիտորդները պատրաստվում էին զեկույց ներկայացնել Վրաստանում կայացած ընտրությունների վերաբերյալ, Եվրախորհրդարանի և Եվրոպայի խորհրդի խորհրդարանական վեհաժողովի (ԵԽԽՎ) անդամները ճնշում են գործադրել դիտորդական առաքելության վրա՝ կազմակերպությանը ստիպելու ներկայացնել իրենց ցանկալի զեկույցը։
