Արցախի խորհրդարանի նախկին նախագահ Դավիթ Իշխանյանը Բաքվի բանտից հերթական ուղերձում անդրադարձել է հայ գերիների դեմ ընթացող դատավարություններին՝ նշելով, որ «դատավճիռը վաղուց է կայացվել». փոխանցում է Sputnik Արմենիան։ Իշխանյանի խոսքով՝ ձերբակալված հայերի պաշտպանական ելույթները հետաքրքիր և յուրօրինակ են եղել, սակայն թե՛ առաջին ատյանի դատարանում, թե՛ այս դատավարության ընթացքում դատախազության ներկայացուցիչներն ու դատավորը, նրա պնդմամբ, անհիմն միջամտել են ելույթներին և թույլ չեն տվել դրանք ավարտին հասցնել։
«Քաղաքական» դատարանը այլ կերպ լինել չէր կարող, նշել է Արցախի խորհրդարանի նախկին նախագահը։ Նա նաև առանձնացրել է փաստաբաններից մեկին, որը դեռ առաջին ատյանի դատարանում նախազգուշացրել էր, որ հետագա սերունդները ամաչելու են այս դատավարությունների համար։ Իշխանյանի գնահատմամբ՝ քաղաքական և բարոյական առումով մեղադրող կողմը պարտվել է գործընթացում, իսկ հայ գերիները հասնելու են միջազգային դատարան։
Նա անդրադարձել է նաև դատավարությունների՝ իր բնորոշմամբ, միակողմանի լուսաբանմանը, այդ թվում՝ «լիբերալ» համարվող լրատվամիջոցների կողմից՝ առանձին դիմելով «Ազատություն» ռադիոկայանին։ Իշխանյանը նշել է, որ երկու տարվա դատավարության ընթացքում, երկու ատյաններում էլ, պաշտպանական կողմը չի ստացել ոչ մեղադրական ակտը, ոչ մեղադրական եզրակացությունը, ոչ էլ առաջին ատյանի դատարանի դատավճիռը։
