Բահրեյնում գործարկվել է անվտանգության համակարգը՝ Իրանի կողմից իրականացված հրթիռային և անօդաչու հարձակման պատճառով։
Երկրի ներքին գործերի նախարարությունը տեղեկացրել է օդային տագնապի ազդանշանների միացման մասին, իսկ քաղաքացիներին կոչ է արվել տեղափոխվել մոտակա անվտանգ վայրեր։ Միևնույն ժամանակ, իրանական լրատվամիջոցները հաղորդում են, որ Բահրեյնի տարածքում հարված է հասցվել ԱՄՆ Հինգերորդ նավատորմի բազային, որտեղ այժմ հրդեհ է բռնկվել։
Արաբական Միացյալ Էմիրությունների պաշտպանության նախարարությունն իր հերթին հայտնել է, որ երկրի ՀՕՊ ուժերը հետ են մղել բալիստիկ ու թևավոր հրթիռներով, ինչպես նաև անօդաչու սարքերով իրականացված հարձակումները։ ԱՄԷ-ի գերատեսչության փոխանցմամբ՝ երկրի տարբեր հատվածներում բնակիչների լսած պայթյունների ձայները պայմանավորված են եղել հակաօդային պաշտպանության միջոցների աշխատանքով, որոնք որսացել են օդային թիրախները։ Իրավիճակի կտրուկ սրումը հետևանք է ԱՄՆ-ի այն հայտարարության, որով Վաշինգտոնը հայտնել էր Իրանին պատասխան հարվածներ հասցնելու մասին՝ Հորմուզի նեղուցում իրանական ուժերի կողմից քաղաքացիական նավի վրա կատարված հարձակման պատճառով։
