Ford ընկերությունը հայտարարել է ԱՄՆ-ում ավելի քան 741 հազար ավտոմեքենա հետ կանչելու մասին՝ փոխանցման տուփի անսարքության պատճառով, ինչը կարող է վնասել կայանման ռեժիմում ավտոմեքենայի ֆիքսման մեխանիզմը և մեծացնել ճանապարհատրանսպորտային պատահարների վտանգը, հաղորդում է Associated Press-ը։
Ինչպես հայտնել է ԱՄՆ Ճանապարհային երթևեկության անվտանգության ազգային վարչությունը (NHTSA), հետկանչը տարածվում է 2018–2021 մոդելային տարիների մի շարք Ford F-150, Ford Explorer, Ford Expedition, Lincoln Aviator և Lincoln Navigator ավտոմեքենաների վրա։
Կարգավորող մարմնի տվյալներով՝ ընթացքի ժամանակ փոխանցումների որոշակի փոխարկումների դեպքում կարող է տեղի ունենալ փոխանցման տուփի կայանման մեխանիզմի կարճատև գործարկում, ինչը հնարավոր է հանգեցնի դրա բաղադրիչների վնասմանը։
Եթե կայանման մեխանիզմը վնասվի, ապա սելեկտորը Park ռեժիմի բերելուց հետո ավտոմեքենան կարող է չպահվել տեղում, եթե միաժամանակ գործարկված չէ ձեռքի արգելակը։ Ավտոմեքենայի նման չնախատեսված տեղաշարժը մեծացնում է վթարների և վնասվածքներ ստանալու վտանգը։
Ford-ից հայտնել են, որ իրենց հայտնի է տվյալ անսարքությանն առնչվող գույքին հասցված վնասի 24 դեպքի և ենթադրյալ վնասվածքների 9 դեպքի մասին։ Ընդ որում, դրանցից երկուսը վերաբերում են հոգեբանական վնասի մասին հայցերին։
Ավտոմեքենաների սեփականատերերը փոստով կստանան ծանուցումներ՝ խորհուրդ տալով դիմել Ford-ի կամ Lincoln-ի պաշտոնական դիլերին։ Մասնագետներն անվճար կթարմացնեն ուժային ագրեգատի կառավարման բլոկի ծրագրային ապահովումը, ինչպես նաև կստուգեն փոխանցման տուփի կայանման մեխանիզմի վիճակը։ Անհրաժեշտության դեպքում վնասված դետալները կփոխարինվեն՝ առանց ավտոմեքենաների սեփականատերերի համար որևէ ծախսի։
