Կանադայի իշխանությունները չեն ոչնչացնում Երկրորդ համաշխարհային պատերազմի ժամանակաշրջանի «Բրաունինգ» (Browning Hi-Power) ատրճանակների մնացորդային պաշարը, քանի որ հնարավոր է դրանք փոխանցվեն Ուկրաինային։ Ինչպես հաղորդում է Ottawa Citizen թերթը՝ հղում անելով իր աղբյուրներին, Օտտավան դեռևս պատասխան չի ստացել Կիևից այն մասին, թե արդյոք այդ զենքը անհրաժեշտ է Ուկրաինայի զինված ուժերին։
Պարբերականի տվյալներով՝ Կանադայի իշխանությունները դեռևս 2022 թվականին որոշում էին ընդունել գրեթե 11 հազար հնացած ատրճանակների ոչնչացման մասին, սակայն երկու տարի անց որոշվել է դրանցից շուրջ 10,5 հազար միավոր ուղարկել Ուկրաինա։ Այդուհանդերձ, թերթի աղբյուրների փոխանցմամբ, մատակարարումները մինչ օրս չեն սկսվել, քանի որ Օտտավան դեռ սպասում է Կիևի հաստատմանը, որ Երկրորդ համաշխարհային պատերազմի ժամանակաշրջանի այդ ատրճանակները անհրաժեշտ են։
Browning Hi-Power ատրճանակի արտադրությունը սկսվել է դեռևս 1935 թվականին։ Ամբողջ ընթացքում արտադրվել է ավելի քան 1 միլիոն միավոր։ Կանադայի իշխանությունները հնացած ատրճանակների ոչնչացման գործընթացը սկսել են 2022 թվականից հետո, երբ երկրի պաշտպանության նախարարությունը ձեռնամուխ է եղել նոր մոդելի զենքի գնմանը։ Գերատեսչությունում վստահեցրել են, որ ոչնչացման չեն ենթարկվի միայն մի քանի հարյուր նմուշներ, որոնք կփոխանցվեն թանգարաններին։
