ՄԱԿ-ը լուրջ բարեփոխումների կարիք ունի, կազմակերպությունը չի կարողանում հաղթահարել իր առջև դրված խնդիրները, հայտարարել է Թուրքիայի նախագահ Ռեջեփ Թայիփ Էրդողանը՝ ելույթ ունենալով Շանհայի համագործակցության կազմակերպության (ՇՀԿ) պետությունների ղեկավարների խորհրդի 25-րդ նիստի ընդլայնված նիստում։
«ՄԱԿ-ը լուրջ բարեփոխումների կարիք ունի։ Իմ ընկեր Անտոնիո Գուտերեշի (ՄԱԿ-ի գլխավոր քարտուղար) բոլոր ջանքերին չնայած, կազմակերպությունը չի կարողանում հաղթահարել իր առջև դրված խնդիրները։ Պաղեստինի ժողովրդի նկատմամբ տարիներ շարունակ կատարված վայրագությունների ֆոնին մեր ընդհանուր պարտականությունն է ՄԱԿ-ը դարձնել համաշխարհային արդարադատությունը ներկայացնող հարթակ», - ասել է Թուրքիայի առաջնորդը։
Նրա խոսքով՝ Թուրքիան կողմնակից է, որ բոլոր խնդիրները լուծվեն բոլոր երկրների ինքնիշխանության և տարածքային ամբողջականության հարգանքի հիման վրա՝ երկխոսության, դիվանագիտության և համագործակցության ոգով։
Թուրքիայի նախագահ Ռեջեփ Թայիփ Էրդողանը պարբերաբար հանդես է եկել ՄԱԿ-ի և Անվտանգության խորհրդի բարեփոխման օգտին՝ կոչ անելով 20 երկրների ընդգրկել ռոտացիոն կարգով և վերացնել մշտական և ժամանակավոր անդամների բաժանումը։
