Իրանը պատրաստ է ամրապնդել հարաբերությունները Կատարի հետ և գնահատում է Դոհայի միջնորդական ջանքերը՝ տարածաշրջանում լարվածության նվազեցման համար, հայտարարել է Իրանի փոխարտգործնախարար Մաջիդ Թախտ-Ռավանչին Կատարի արտաքին գործերի պետական նախարար Մոհամմեդ ալ-Խուլեյֆիի հետ հեռախոսազրույցի ժամանակ։
«Նշելով Իրանի և Կատարի միջև բարեկամական և ամուր հարաբերությունները՝ Թախտ-Ռավանչին վերահաստատել է Իրանի ցանկությունը՝ շարունակել և ամրապնդել երկկողմ հարաբերությունները՝ հիմնված բարիդրացիության և փոխադարձ շահերի սկզբունքի վրա», - ասվում է Իսլամական Հանրապետության արտաքին գործերի նախարարության հայտարարության մեջ, որի տեքստը մեջբերել է Իրանի պետական հեռուստառադիոընկերությունը։
Իրանի փոխարտգործնախարարը բարձր է գնահատել Կատարի դերը «տարածաշրջանում հետագա սրացումը կանխելու» գործում։
Թախտ-Ռավանչին նշել է, որ Թեհրանը թույլ չի տա, որ Իսրայելի և ԱՄՆ-ի թշնամական գործողությունները հանգեցնեն Իրանի և տարածաշրջանի երկրների միջև տարաձայնությունների: Իր հերթին, ալ-Խուլեյֆին մատնանշել է Դոհայի և Թեհրանի միջև «հատուկ հարաբերությունները»՝ կոչ անելով տարածաշրջանի բոլոր երկրներին համատեղ ջանքեր գործադրել անվտանգությունն ու կայունությունն ապահովելու համար:
