Գրել էինք, որ Երևանի քաղաքապետարանը միջոցառումների կազմակերպման համար մեկ անձից գնումներով պայմանագրեր է կնքել մի կազմակերպության հետ, որի ղեկավարը սերտ հարաբերությունների մեջ է Կենտրոնի թաղապետի և քաղաքապետի խորհրդականի հետ։ Լուրեր․com կայքին հայտնի դարձավ, որ նույն ընկերությունը՝ «Ֆակտորի Փրոդաքշն» ՍՊԸ-ն, հերթական խոշոր պայմանագիրն է կնքել կառավարության հետ, այս անգամ արդեն «Մեր ժամանակների հերոսը» ամենամյա մրցանակաբաշխությունը կազմակերպելու համար։
Պայմանագրում նշված է, որ գումարը կազմում է 150 մլն դրամ։ Այն, ինչ իրականացնելու է վերոնշյալ ընկերությունը, չափազանց կասկածելի է, քանի որ պայմանագրում նշված ծախսերը կարծես թե ուռչացված են։
Օրինակ, պայմանագրում գրված է, ամբողջական տեխնիկական հագեցվածություն, որի դիմաց ծախսվելու է 25 մլն 600 հազար դրամ, իսկ բեմահարթակի կահավորման համար՝ 16 մլն 665 հազար դրամ։ «Ֆակտորի Փրոդաքշն» ՍՊԸ-ն հիմնադրվել է 2017 թվականին, իսկ գնման գործընթացներում՝ գերակտիվություն ցուցաբերել 2018 թվականի հայտնի իրադարձություններից հետո:
Այս ընկերությանն են վստահվել ամենատարբեր մասշտաբային միջոցառումները՝ հիմնականում առանց մրցույթի՝ մեկ անձ և հրատապ մեկ անձ ընթացակարգերով, իսկ ընթացիկ տարվա ապրիլին՝ նաև դրամաշնորհային ծրագրի շրջանակներում:
«Ֆակտորի Փրոդաքշն» ՍՊԸ-ի սեփականատերն է Ռուդիկ Տեր-Գալստյանը, ում պատկանում է ընկերության 100 տոկոս բաժնեմասը։
Ըստ պետական գնումների armeps.am համակարգի՝ 2018 «Ֆակտորի փրոդաքշն»-ի հետ 24 պայմանագրեր են կնքել ՀՀ արտաքին գործերի նախարարությունը, Երևանի քաղաքապետարանը, Արարատի մարզպետարանը, վարչապետի աշխատակազմը, ՀՀ կրթության, գիտության, մշակույթի, սպորտի և Էկոնոմիկայի նախարարությունները: Պայմանագրերը հիմնականում եղել են մեկ անձ ընթացակարգերով։
Բացի այդ շուրջ 3 մլրդ դրամ մեկ անձից ընթացակարգով պայմանագիր է կնքվել Երևանի քաղաքապետարանի և «Ֆակտորի Փրոդաքշն» ՍՊԸ-ի միջև, որպեսզի վերոնշյալ ՍՊԸ-ն կազմակերպի Երևանի տոնին նվիրված միջոցառումները։
Կառավարության ղեկավար Փաշինյանը հայտարարում էր, թե հուժկու պայքար է ընթանում ստվերային գործունեության դեմ, որ հարկ վճարողը հերոս է, սակայն պարզվում է, որ ՔՊ-ականների մտերիմների ընկերությունները միշտ չէ, որ հետևում են իրենց ղեկավարի հորդորներին։
«Ֆակտորի Փրոդաքշն» ՍՊԸ-ն 2020 թվականին չի կատարել իր հարկային պարտավորությունը, վճարելով 1մլն 641 հազար 281 դրամ հարկ։ Ու այսքանից հետո, տվյալ ընկերությունը չի զրկվել պետական աջակցությունից։
Ըստ խոսակցությունների, Ռուդիկ Տեր-Գալստյանը սերտ հարաբերություններ ունի Կենտրոնի թաղապետ Պետրոս Պետոյանի և Երևանի քաղաքապետի խորհրդական Լուսինե Դայանի հետ, ովքեր և նպաստում են, որ ընկերությունը ֆինանսական թռիչքաձև աճ է ունենում պետբյուջեի հաշվին, բնականաբար իրենց վերադասի՝ Տիգրան Ավինյանի, անմիջական մասնակցությամբ։
