ԱՄՆ պատվիրակությունը հաջորդ շաբաթ Հանչժոուում չի մասնակցի Կլիմայի փոփոխության հարցերով միջկառավարական հանձնաժողովի (IPCC) հանդիպմանը: Այս մասին հայտնում է Reuters-ը՝ հղում անելով աղբյուրներին։
IPCC-ն հիմնադրվել է 1988 թվականին։ Կազմակերպության մասնակիցների հաջորդ հանդիպումը կանցկացվի փետրվարի 24-28-ը Չինաստանում։ Կմասնակցեն ավելի քան 195 երկրների պատվիրակություններ, ինչպես նաև ՄԱԿ-ի կլիմայի ներկայացուցիչներ:
Գործակալության տվյալներով՝ գիտական կոնֆերանսին չեն մասնակցի ԱՄՆ Գլոբալ փոփոխության հետազոտական ծրագրի (USGCRP) , Օվկիանոսների և մթնոլորտի ազգային վարչության (NOAA) աշխատող գիտնականները։
Գործակալությունը նշում է, որ ամերիկացիները դեռ կշարունակեն աշխատել կլիմայի հետազոտության վրա, որը վերահսկվում է IPCC-ի կողմից։
Հանդիպմանը չի մասնակցի նաև ամերիկյան NASA տիեզերական գործակալությունը, որը վերջերս խզել էր կազմակերպությանը տեխնիկական աջակցություն ցուցաբերելու պայմանագիրը։
