Տնտեսական մրցակցության պաշտպանության հանձնաժողովը նշել էր, թե ինչ է տեղի ունեցել հարուցված վարույթի հետ և այն կարճվել է։ Այս պահին «Դոպինգ Սփեյս» ընկերությանն ուղարկված գրությանն ակնկալում ենք պատասխան, գտնվում ենք այդ փուլում։
Այս մասին լրագրողների հետ զրույցում ասաց ԿԳՄՍ նախարար Ժաննա Անդրեասյանը՝ անդրադառնալով ամերիկացի ռեփեր Սնութ Դոգի չկայացած համերգին։
Նա նշել է, որ համերգը տեղի չունեցավ ողբերգական իրադարձությունների պատճառով, որոնք այլ օրակարգ ու առաջնահերություններ էին ձևավորվել։
«Արտիստի հետ բանակցությունները վարում է կազմակերպող ընկերությունը, ԿԳՄՍՆ–ն իրականացնող կազմակերպություն չէ։
Բնականաբար, կապի մեջ ենք եղել ընկերության հետ, որը մեզ փոխանցել է, որ բանակցում է և տարբեր փուլերում ունեցել է նախնական համաձայնություններ համերգը նորից կազմակերպելու վերաբերյալ։
Ի վերջո ստացել ենք այն իրավիճակը, որ չի կարողացել կազմակերպել 2024–ի ընթացքում, պայմանագրի ժամկետն ավարտվել է և ինչպես նախատեսված է ընթացակարգով՝ դիմել ենք ամբողջ գումարը վերադարձնելու պահանջով»,– ասաց նա։
