Հունիսի 7-ին, Հայաստանի ազգային հավաքականի և ռուսական «Կրասնոդարի» կիսապաշտպան Էդուարդ Սպերցյանը նշել է ծննդյան 26-րդ տարեդարձը։ Այդ առիթով ֆուտբոլիստը շնորհակալություն է հայտնել երկրպագուներին և խոսել իր կարիերայի ու անցած ճանապարհի մասին։
«Ցանկանում եմ շնորհակալություն հայտնել բոլոր նրանց, ովքեր իմ կողքին են, աջակցում են, ոգեշնչում ու ինձ հետ կիսում այս ճանապարհը:
Ամեն տարին իր հետ բերում է նոր դասեր, փորձություններ, հնարավորություններ և երախտապարտ լինելու առիթներ։ Ես գնահատում եմ այն ամենը, ինչ տեղի է ունենում իմ կյանքում, և մեծ հետաքրքրությամբ եմ նայում ապագային։ Ընկերնե՛ր, շնորհակալ եմ ձեր ջերմ խոսքերի, ուշադրության և բարեմաղթանքների համար»,- գրել է Սպերցյանն իր տելեգրամյան ալիքում:
Հիշեցնենք, որ Էդուարդ Սպերցյանը «Կրասնոդարի» սան է։ Գլխավոր թիմի կազմում նա իր նորամուտը նշել է 2020 թվականին: Այս ընթացքում հայ կիսապաշտպանը բոլոր մրցաշարերում անցկացրել է 185 հանդիպում՝ դառնալով 58 գոլի և 50 գոլային փոխանցման հեղինակ:
