Թուրքիան և Սաուդյան Արաբիան կարող են նպաստել Իրանի շուրջ ստեղծված իրավիճակի դիվանագիտական կարգավորմանը։ Այդպիսի կարծիք է հայտնում Թուրքիայի իշխանամետ Hürriyet թերթը։
«Իրանը Թուրքիայի ամենահուսալի հարևանն է, և նրա կայունությունը դիտարկվում է որպես Թուրքիայի կայունություն: Իրանի հարցով քաղաքական լուծումը դեռևս հնարավոր է։ Այն փակուղուց, որի մեջ հայտնվել է Իրանը, կարող է դուրս բերել միայն Թուրքիայի նախագահ Ռեջեփ Թայիփ Էրդողանը։ Թուրքիան և Սաուդյան Արաբիան կարող են դա ապահովել», — նշել է հրապարակման մեջ թերթի մեկնաբան Աբդուլքադիր Սելվին։
Նա մեջբերել է Թուրքիայի արտաքին գործերի նախարար Հաքան Ֆիդանի հայտարարությունները, որը կոչ է արել ԱՄՆ-ին Իրանի դեպքում չկրկնել Վենեսուելայի փորձը։
«Խորհուրդ եմ տալիս ամերիկացի ընկերներին Իրանը չդարձնել երկրորդ Վենեսուելա։ Իրանը պատրաստ է բանակցությունների, սակայն եթե այնտեղ զգան, որ իրենց անկյուն են մղել, ապա կսկսեն պատրաստվել ամենավատ սցենարին», — զգուշացրել է թուրք նախարարը։
Ավելի վաղ Թուրքիայում իշխող Արդարություն և զարգացում կուսակցության պաշտոնական ներկայացուցիչ Օմեր Չելիքը հայտարարել էր, որ Անկարան դեմ է Իրանի գործերին ցանկացած արտաքին միջամտության։ Նրա կարծիքով՝ նման քայլերը կարող են ծայրահեղ բացասական հետևանքների հանգեցնել։
