Ուկրաինայի նախագահ Վլադիմիր Զելենսկին Telegram -ի իր ալիքում շնորհակալություն է հայտնել Միացյալ Նահանգներին օգնության համար:
«Միացյալ Նահանգների ղեկավարությունը կարևոր է, մենք շնորհակալ ենք այն ամենի համար, ինչ Ամերիկան և նախագահ Թրամփը անում են անվտանգության համար, և մենք մնում ենք հնարավորինս կառուցողական։ Մենք սպասում ենք մեր թիմերի նոր զեկույցներին Շվեյցարիայից»,- գրել է Զելենսկին։
Նա նաև հայտնել է, որ զրույցել է Ֆրանսիայի նախագահ Էմանուել Մակրոնի հետ։
«Մեր թիմերը Ժնևում աշխատում են գործընկերների հետ, և շատ կարևոր է, որ լինի գործնական արդյունք, և որ սա Ուկրաինային և ամբողջ Եվրոպային մոտեցնի հուսալի խաղաղությանն ու անվտանգությանը։ Մենք համակարգում ենք դիրքորոշումները, և կարևոր է, որ լինի երկխոսություն, ակտիվանա դիվանագիտությունը, մենք ակնկալում ենք, որ գործընկերները կլսեն մեր փաստարկները»,- գրել է նա՝ շնորհակալություն հայտնելով Մակրոնին։
Ավելի վաղ ԱՄՆ նախագահ Դոնալդ Թրամփը հայտարարել է, որ Միացյալ Նահանգները շարունակում է զենք վաճառել ՆԱՏՕ-ին՝ Ուկրաինայում հետագա բաշխման համար, չնայած Կիևը որևէ երախտագիտություն չի հայտնել նրանց ջանքերի համար։ «Ուկրաինայի ղեկավարությունը զրո երախտագիտություն է հայտնել մեր ջանքերի համար, մինչդեռ Եվրոպան շարունակում է նավթ գնել Ռուսաստանից, իսկ ԱՄՆ-ն շարունակում է ՆԱՏՕ-ին հսկայական քանակությամբ զենք վաճառել՝ Ուկրաինայում հետագա բաշխման համար», – գրել է նա Truth Social-ում։
