Պաղեստինյան արմատական ՀԱՄԱՍ շարժման պատվիրակությունը՝ Գազայի հատվածում իր առաջնորդ Խալիլ ալ-Հայայի գլխավորությամբ, ժամանել է Կահիրե՝ միջնորդների հետ քննարկելու պաղեստինյան անկլավում հրադադարի համաձայնագրի երկրորդ փուլը։ Այս մասին հայտնել է Al Hadath հեռուստաընկերությունը՝ հղում անելով աղբյուրներին։
Ըստ աղբյուրների՝ պատվիրակությունը նախատեսում է հանդիպել «եգիպտական հետախուզության ներկայացուցիչների հետ»՝ քննարկելու պաղեստինյան անկլավում ստեղծված իրավիճակը, ինչպես նաև միջնորդների հետ քննարկելու «տեղում տեղի ունեցած վերջին զարգացումները և Գազայի հատվածում խաղաղության գործընթացի երկրորդ փուլը»։ Աղբյուրները պարզաբանել են, որ այցը նախապես պլանավորված էր, և որ քննարկվելու է Իսրայելի կողմից պաղեստինյան անկլավում շարունակվող սրացումը։
