Վրաստանի իշխանությունները թույլ չեն տա, որ երկիրն օգտագործվի այնպես, ինչպես օգտագործվեց Ուկրաինան, ինչը հանգեցրեց նրա համար ամենածանր հետևանքների։ Այս մասին հայտարարել է իշխող «Վրացական երազանք - ժողովրդավարական Վրաստան» կուսակցության գլխավոր քարտուղար, Թբիլիսիի քաղաքապետ Կախա Կալաձեն։
«Մենք մեր քաղաքականությամբ և հայացքներով պաշտպանում ենք մեր երկիրը և վարում ենք մի քաղաքականություն, որտեղ, առաջին հերթին, պաշտպանվում են մեր հայրենիքի շահերը։ Մենք թույլ չենք տա որևէ մեկին օգտագործել մեր երկիրը այնպես, ինչպես օգտագործվել է Ուկրաինան և կրել այն ծանր հետևանքները, որոնք, ցավոք, ունի Ուկրաինան», - լրագրողներին ասել է Կալաձեն։
Նա նաև նշել է, որ նրանք փորձում են Վրաստանին ներքաշել Ռուսաստանի հետ ռազմական հակամարտության մեջ։
«Կային ուղղակի սպառնալիքներ վարչապետի, իշխող կուսակցության նախագահի հասցեին, որպեսզի երկրում բացվի երկրորդ ճակատ, և մեզ տրամադրվեն բոլոր տեսակի զենքեր», - ասել է Կալաձեն։
