Բրիտանիայի կառավարությունը համաձայնել է հրաժարվել իր վիճահարույց պահանջից՝ Apple-ի օգտատերերի iCloud-ում պահվող կոդավորված տվյալներին մուտք ստանալու վերաբերյալ։ Ինչպես գրում է MacRumors-ը, այս մասին հայտնել է ԱՄՆ հետախուզության տնօրեն Թուլսի Գաբբարդը, նշելով, որ այս որոշումը կանխելու է «սև անցքի» (backdoor) ստեղծումը, ինչը կարող էր վտանգել միլիոնավոր օգտատերերի գաղտնիությունը։
X սոցիալական ցանցում (նախկինում՝ Twitter) հրապարակված իր գրառման մեջ Գաբբարդը նշել է, որ Մեծ Բրիտանիան հրաժարվել է Apple-ին պարտադրել «սև անցք» ստեղծել, ինչը «կհնարավորեցներ մուտք ստանալ ամերիկացի քաղաքացիների պաշտպանված կոդավորված տվյալներին և կխախտեր մեր քաղաքացիական ազատությունները»։
Թեև Բրիտանիան համաձայնվել է չեղարկել համապատասխան որոշումը, այն դեռևս պաշտոնապես ետ չի վերցվել։ ԶԼՄ-ները նշում են, որ Apple-ը առայժմ որևէ պաշտոնական ծանուցում չի ստացել որևէ կառավարության կողմից։
Ավելի վաղ այս տարվա ընթացքում Մեծ Բրիտանիան կիրառել էր իր Քննչական լիազորությունների մասին օրենքը (Investigatory Powers Act, IPA), որպեսզի պահանջի գաղտնի մուտք կոդավորված տվյալներին, որոնք պահվում են iCloud-ում ամբողջ աշխարհում։ Ի պատասխան՝ Apple-ն հայտարարել էր, որ նախընտրում է ամբողջությամբ հեռացնել «Ընդլայնված տվյալների պաշտպանություն» (Advanced Data Protection) ֆունկցիան Բրիտանիայից, քան խախտել իր անվտանգության չափանիշները։
Ընկերությունը հստակ նշել էր, որ պատրաստ է հեռացնել iCloud-ի կարևոր ֆունկցիաները, ինչպիսիք են FaceTime-ը և iMessage-ը, եթե ստիպված լինի զիջումների գնալ օգտատերերի անվտանգության հարցում։ Բրիտանական կողմը իր պահանջը արդարացնում էր ահաբեկչության դեմ պայքարի և երեխաների նկատմամբ սեռական բռնության դեպքերի բացահայտման անհրաժեշտությամբ։
Թարգմանությունը՝ Euromedia24.com-ի
