Մագնիսական փոթորիկները չեն կարող առաջացնել ինսուլտ կամ այլ անոթային խնդիրներ։ Այս մասին kp.ru-ին պատմել է սրտաբույժ, բժշկական գիտությունների թեկնածու, ՌԴ Առողջապահության նախարարության Ալմազովի անվան ազգային բժշկական հետազոտական կենտրոնի գիտաշխատող, «Առողջ լինելու սովորույթը. ինչպես կանխել հիպերտոնիան, ինֆարկտը և ինսուլտը» գրքի հեղինակ Նատալյա Գավրիլյուկը։
«Այսօրվա դրությամբ չկա համոզիչ գիտական տվյալ, որը հաստատում է մագնիսական փոթորիկների ազդեցությունը մարդու մոտ անոթային խնդիրների առաջացման վրա։ Շատ հաճախ մարդը իր վատ ինքնազգացողությունը վերագրում է արևային «փոթորիկին», մինչդեռ դա պարզապես համընկնում է՝ տարբեր մանր խանգարումների կուտակման արդյունք է օրգանիզմում», – բացատրել է բժիշկը։
Նրա խոսքով՝ ինքնազգացողության վատթարացումը կարող է պայմանավորված լինել այլ գործոններով։ Դրանց շարքում են՝ աշխատանքային սթրեսը, անբավարար քունը, աղի չափից ավելի օգտագործումը կամ արյան ճնշման հանկարծակի տատանումները, հստակեցրել է Գավրիլյուկը։
Ընդհանուր պրակտիկայի բժիշկ Ռոման Ֆիշկինն ավելի վաղ նշել էր, որ մթնոլորտային զգայունության ախտանիշները նվազեցնելու համար նման բնական երևույթների ժամանակ անհրաժեշտ է հետևել պարզ կանոնների։
Մասնավորապես, խորհուրդ է տրվում սահմանափակել ֆիզիկական և հուզական ծանրաբեռնվածությունը, խուսափել սթրեսից, խմել ավելի շատ ջուր, բացառել ալկոհոլը, սուրճը, ճարպոտ և աղի սնունդը։ Բժիշկը նաև խորհուրդ է տվել ընդունել հակադրությամբ ցնցուղ, իսկ գլխացավի դեպքում՝ մերսել քունքերը և օգտագործել սառը կոմպրեսներ։
Թարգմանությունը՝ Euromedia24.com-ի
