Ոսկրածուծի փոխպատվաստումը կարող է կանխել հազվագյուտ և մահացու հիվանդության զարգացումը, որի դեպքում ուղեղի բջիջները «ձախողվում են»։ Այս եզրակացությանն են հանգել Շանհայի Ջիաոտոնգ համալսարանի բժշկական դպրոցի գիտնականները։ Արդյունքները հրապարակվել են Science ամսագրում։
Խոսքը աքսոնալ սֆերոիդներով և պիգմենտային գլիայով (ALSP) լեյկոէնցեֆալոպաթիայի մասին է։ ALSP-ն առաջանում է CSF1R գենի մուտացիայից, որի պատճառով միկրոգլիան՝ ուղեղի իմունային բջիջները, ոչնչացվում են։ Սա հանգեցնում է վնասված նեյրոնների կուտակմանը, հյուսվածքների կալցիֆիկացմանը, նյարդային մանրաթելերի վնասմանը և շարժողական ու ճանաչողական խանգարումների զարգացմանը։ Մինչ օրս հիվանդությունն ուսումնասիրելու համար ո՛չ արդյունավետ բուժում կար, ո՛չ էլ համապատասխան կենդանական մոդել։
Հետազոտողները ստեղծել են մարդու CSF1R մուտացիաներով մկների երկու գիծ, որոնք զարգացրել են ALSP-ի բոլոր հիմնական առանձնահատկությունները։ Այնուհետև նրանք փորձարկել են ոսկրածուծի փոխպատվաստում։ Նույնիսկ առանց լրացուցիչ միջամտությունների փոխպատվաստումը արդյունավետ էր. մարմնի սեփական միկրոգլիայի թուլացման պատճառով նոր բջիջները արագ փոխարինել են այն։
Մեթոդը փորձարկվել է նաև մարդկանց վրա՝ ALSP-ով ութ հիվանդ ենթարկվել է ոսկրածուծի փոխպատվաստման։ Վիրահատությունից հետո երկու տարի հիվանդությունը չի զարգացել՝ բջիջներում մուտացիաները վերացվել են։
Հեղինակների խոսքով՝ սա հեռանկարներ է բացում այս մոտեցումը միկրոգլիայի դիսֆունկցիայի հետ կապված այլ հիվանդությունների դեպքում կիրառելու համար։ Դրանց թվում են դեմենցիայի որոշ ձևեր։ Գիտնականները նշում են, որ մեթոդի լայն կիրառման համար անհրաժեշտ է գտնել բջիջների փոխարինման արդյունավետության և ընթացակարգի անվտանգության միջև օպտիմալ հավասարակշռություն։
Թարգմանությունը՝ Euromedia24.com-ի
