Չինաստանի Բանակի բժշկական համալսարանի գիտնականները պարզել են,
որ քնի ռեժիմի խախտումը կարող է զգալիորեն մեծացնել ավելի քան 170 հիվանդությունների զարգացման ռիսկը։ Լայնածավալ հետազոտության արդյունքները հրապարակվել են Health Data Science (HDS) ամսագրում։
Հետազոտության մեջ օգտագործվել են UK Biobank-ի 90 հազար մարդու առողջական տվյալները։ Մասնակիցները մի քանի տարի շարունակ կրել են ակսելերոմետրեր, որոնք գրանցել են քնի տևողությունը, դրա կայունությունը, գիշերային արթնացումների հաճախականությունը և կանոնավոր գրաֆիկից շեղումները։ Այս մոտեցումը գիտնականներին թույլ է տվել ավելի ճշգրիտ պատկեր ստանալ, քան ավանդական հարցումները։
Ըստ ստացված տվյալների՝ անկայուն քունը կարող է ավելի քան երկու անգամ մեծացնել այնպիսի հիվանդությունների ռիսկը, ինչպիսիք են՝ երկրորդ տիպի շաքարախտը, Պարկինսոնի հիվանդությունը, լյարդի ցիռոզը, գանգրենան և երիկամների սուր վնասումը։ Օրինակ՝ այն մարդկանց մոտ, ովքեր քնում են ժամը 00:30-ից հետո, լյարդի ցիռոզի զարգացման ռիսկը 2.5 անգամ ավելի բարձր է, քան նրանց մոտ, ովքեր քնում են ժամը 23:00-ի շրջակայքում։ Քնի ռիթմի խանգարումները ավելի քան երկու անգամ մեծացնում են գանգրենայի հավանականությունը։
Բացահայտված բոլոր կապերի գրեթե կեսը վերաբերում է հենց քնի խախտված գրաֆիկին։ Այս ոլորտը նախկինում բավարար չի ուսումնասիրվել՝ օբյեկտիվ տվյալների պակասի պատճառով։ Լրացուցիչ վերլուծությունը ցույց է տվել, որ քնի խանգարումներ ունեցող մարդկանց մոտ ավելի հաճախ են նկատվում բորբոքման նշաններ, մասնավորապես՝ լեյկոցիտների և C-ռեակտիվ սպիտակուցի բարձր մակարդակ արյան մեջ։
