Եվրոպական երկրները կարող են վերականգնել Իրանի դեմ 10 տարի առաջ չեղարկված պատժամիջոցները, եթե Թեհրանից չստանան բավարար երաշխիքներ, որ այն մտադիր է պահպանել միջուկային ծրագրի վերաբերյալ համաձայնագրի պայմանները, հայտարարել է Ֆրանսիայի արտգործնախարար Ժան-Նոել Բարոն Բրյուսելում ԵՄ արտգործնախարարների հանդիպմանը ժամանելուն պես։
«Ֆրանսիան և նրա գործընկերներն ունեն լիակատար իրավունք վերականգնելու զենքի, բանկային և միջուկային սարքավորումների վրա համաշխարհային էմբարգոն, որը վերացվել էր տասը տարի առաջ։ Առանց Իրանի կողմից հստակ, շոշափելի և ստուգելի պարտավորությունների, մենք դա կանենք ոչ ուշ, քան օգոստոսի վերջը», - ասել է նա։
Նախարարը կոչ է արել անհապաղ ազատ արձակել իրանական բանտերում պահվող Ֆրանսիայի քաղաքացիներին և վերսկսել Ատոմային էներգիայի միջազգային գործակալության (ԱԷՄԳ) տեսուչների աշխատանքը Իրանի միջուկային օբյեկտներում։
