ԱՄՆ նախագահի ազգային անվտանգության հարցերով օգնական Ջեյք Սալիվանը հայտարարել է, որ Վաշինգտոնը մտադիր չէ հրաժարվել դիվանագիտությունից՝ Թեհրանի և Պեկինի հետ հարաբերություններում։
«Իրանի և Չինաստանի առումով, կարծում եմ, կան հնարավորություններ ոչ միայն զսպման և հակազդեցության, այլ նաև դիվանագիտության առումով: Չինաստանի դեպքում դիվանագիտությունը անհրաժեշտ է մրցակցությունն արդյունավետ կառավարելու և ավելի լավ հասկանալու համար, թե ինչնպես
երկու մեծ տերությունները կարող են գոյակցել»,- ասել է նա CNN International-ի եթերում:
Միևնույն ժամանակ, Սալիվանն ասել է, որ թերահավատորեն է վերաբերվում ԱՄՆ-ի և Չինաստանի միջև ինչ-որ «մեծ գործարքի» կնքման հնարավորությանը։ ԱՄՆ նախագահի ազգային անվտանգության հարցերով օգնականի խոսքով՝ Պեկինի հետ հարաբերություններում «մրցակցային ասպեկտի» պատճառով Վաշինգտոնը պետք է «ուժեղացնի իր մրցունակությունը, այլ ոչ թե Չինաստանին վաճառի առաջադեմ տեխնոլոգիաներ», որոնք կարող են օգտագործվել Միացյալ Նահանգների և նրա դաշնակիցների դեմ։
«Բայց ես կարծում եմ, որ Միացյալ Նահանգների նախագահի և Չինաստանի ղեկավարի միջև դիվանագիտական հարաբերությունները կարող են ավելի մեծ կայունություն բերել և հնարավորություններ ստեղծել մեր համագործակցության համար այն ոլորտներում, որոնք փոխադարձ հետաքրքրություն են ներկայացնում մեզ համար»,-եզրափակել է նա։
Սալիվանը հավելել է, որ «Իրանի դեպքում» տեսնում է նոր միջուկային համաձայնագրի շուրջ համաձայնության գալու «իրական հնարավորություն»։
«Դա հետաքրքիր կլիներ, քանի որ Թրամփն էր, որ դուրս եկավ միջուկային վերջին համաձայնագրից, բայց միգուցե այս անգամ նա կարողանա դա կազմակերպել՝ հաշվի առնելով այն իրավիճակը, որում գտնվում է Իրանը», ասել է ամերիկացի առաջնորդի խորհրդականը։
Նա պնդել է, որ այսօր «Իրանը թուլացել է», և դա կարող է ստիպել Թեհրանին միջուկային ռումբ ստեղծել։
