Արքայազն Էնդրյուն չինացի գործարարի հետ «լրտեսական սկանդալից» հետո կարող է լքել Մեծ Բրիտանիան։ Վերջինս դիտարկում է Պարսից ծոցի երկրները տեղափոխվելու հնարավորությունը, գրում է Daily Beast-ի ամերիկյան հրատարակությունը՝ վկայակոչելով արքայազնի երկու մտերիմ ընկերներին։
Ավելի վաղ բրիտանական դատարանը հայտնել էր արքայազն Էնդրյուի վստահելի անձի անունը, ով կասկածվում էր Չինաստանի օգտին լրտեսության մեջ։ Պարզվել էր, որ նա 50-ամյա չինացի գործարար Յանգ Թենբոն է։ Վերջինս հերքում է իր նկատմամբ առաջ քաշված բոլոր մեղադրանքները:
«Էնդրյուն հոգնել է բրիտանական մամուլում որպես վտարանդի ներկայացվելուց և լրջորեն մտածում է Արաբական Միացյալ Էմիրություններ կամ Բահրեյն տեղափոխվելու մասին: Մեզանից ոչ ոք նրան չէր մեղադրի, եթե նա որոշեր նմանվել արքայազն Հարիին և հեռանալ», - մեջբերում է արքայազնի ընկերը։
Էնդրյուի մեկ այլ մտերիմ ընկեր հավելել է, որ արքայազնը «շփումների լայն շրջանակ» ուներ և կարող է արդյունավետ կյանք վարել տարածաշրջանում։ Մասնավորապես, նա տասնամյակներ շարունակ մշտական այցելու է եղել Բահրեյնին, որտեղ նրան հյուրընկալել է թագավոր Համադ բեն Իսա Ալ Խալիֆան։
