Արաբիկա սուրճի գներն աճել են մինչև 3 դոլար մեկ ֆունտի դիմաց՝ հասնելով 2011 թվականի ապրիլից ի վեր ամենաբարձր ցուցանիշին: Այս մասին են վկայում Նյու Յորքի ֆոնդային բորսայի առուվաճառքի տվյալները։
Սուրճի համաշխարհային առաջատար համարվող Բրազիլիայի բերքը, ըստ երևույթին, կորցրել է որոշակի ներուժ երաշտի պատճառով, քանի որ տվյալները վկայում են այս սեզոնում արաբիկայի արտադրության անկման մասին, գրում է Trading Economics-ը:
Չնայած Բրազիլիայում վերջին անձրևներին, հողի խոնավությունը մնում է անբավարար, նշում են փորձագետները: Սա խոչընդոտում է պտղի զարգացմանը, ինչը կարող է վտանգել հաջորդ տարվա բերքը։
StoneX խորհրդատվական ընկերության հետազոտության համաձայն՝ 2025/26 թվականներին Բրազիլիայում սուրճի բերքը կկազմի 65,6 միլիոն 60 կգ տոպրակ, ինչը 0,4%-ով պակաս է նախորդ շրջանի համեմատ: Ակնկալվում է, որ արաբիկայի բերքը տարեկան կտրվածքով կնվազի 10,5%-ով՝ հասնելով 40 միլիոն պարկի:
Միևնույն ժամանակ, 2023/24 սեզոնին սուրճի համաշխարհային արտահանումն աճել է գրեթե 12%-ով։
