Այն բանից հետո, երբ Ուկրաինային հարվածելու համար Ռուսաստանի զինված ուժերի կողմից միջմայրցամաքային բալիստիկ հրթիռի կիրառման մասին լուրեր տարածվեցին, իսկ Ռուսաստանի նախագահը հայտարարեց, որ Ռուսաստանի Դաշնության տարածքում արևմտյան հեռահար զինատեսակներ են կիրառվել՝ ՄԱԿ-ը ուկրաինական հակամարտության կողմերին կոչ է արել շտապ քայլեր ձեռնարկել էսկալացիան կանխելու համար։ Այդ մասին լրագրողներին հայտնել է համաշխարհային կազմակերպության գլխավոր քարտուղարի պաշտոնական ներկայացուցիչ Ստեֆան Դյուժարիկը։
«Այս ամենը սխալ ուղղությամբ է ընթանում: Մենք ցանկանում ենք, որ բոլոր կողմերը շտապ քայլեր ձեռնարկեն իրավիճակի սրումը կանխելու համար, ապահովելու, ինչպես մենք բազմիցս ասել ենք, խաղաղ բնակիչների պաշտպանությունը՝ չթիրախավորելով քաղաքացիական թիրախները կամ կարևոր քաղաքացիական ենթակառուցվածքները»,-ասել է նա։
