Ատոմային էներգիայի միջազգային գործակալությունը (ՄԱԳԱՏԷ) հայտնել է, որ հունիսի 20-ին Զապորոժիեի ատոմային էլեկտրակայանում անջատվել է արտաքին էլեկտրամատակարարումը։ Գործակալության փոխանցմամբ՝ սա ռուս-ուկրաինական պատերազմի սկզբից ի վեր արձանագրված արդեն 20-րդ նմանատիպ դեպքն է։
ՄԱԳԱՏԷ-ի առաքելության տվյալներով՝ կայանի միակ հասանելի արտաքին էլեկտրահաղորդման գծի՝ «Ֆերոսպլավնայա-1»-ի անջատման պատճառը եղել է ԱԷԿ-ի ներքին էլեկտրահաղորդման գծերում առաջացած խնդիրը։
Արտաքին սնուցման դադարեցումից անմիջապես հետո ավտոմատ կերպով գործարկվել են վթարային դիզելային գեներատորները։ Դրանք անհրաժեշտ են ռեակտորի ակտիվ գոտու սառեցումն ապահովելու և միջուկային անվտանգության մյուս կենսական համակարգերի անխափան աշխատանքը պահպանելու համար։
