Իսրայելի վարչապետ Բենիամին Նեթանյահուն հայտարարել է, որ ինքը զգուշացրել է ԱՄՆ նախագահ Դոնալդ Թրամփին Բեյրութին հարվածելու իր մտադրության մասին:
Նա ասել է, որ դա տեղի կունենա, եթե «Հեզբոլլահի» աշխարհազորայինները շարունակեն հարձակվել Իսրայելի տարածքի վրա։ «Ես այսօր երեկոյան խոսեցի նախագահ Թրամփի հետ և ասացի նրան, որ եթե «Հեզբոլլահը» չդադարեցնի մեր քաղաքների և քաղաքացիների վրա հարձակումները, Իսրայելը կհարձակվի ահաբեկչական թիրախների վրա Բեյրութում:
Մեր դիրքորոշումը մնում է անփոփոխ», – ասել է Նեթանյահուն, ըստ վարչապետի գրասենյակի։ Նա հավելել է, որ իսրայելական զորքերի գործողությունները հարավային Լիբանանում, որտեղ սկզբնական հայտարարված ծրագիրը Լիտանի գետից հարավ բուֆերային գոտի ստեղծելն էր, շարունակվում են:
«Միևնույն ժամանակ, Իսրայելի պաշտպանության բանակը կշարունակի գործել իր ծրագրի համաձայն հարավային Լիբանանում», – հավելել է վարչապետը։
Հունիսի 1-ին ԱՄՆ նախագահը հայտարարել է, որ համաձայնության է եկել Նեթանյահուի և «Հեզբոլլահի» ղեկավարության հետ Լիբանանում հրադադարի վերաբերյալ:
Իսրայելի վարչապետի հետ հեռախոսազրույցից հետո ամերիկացի առաջնորդը հայտարարել է, որ իսրայելական զորքերը «չեն ուղարկվի Բեյրութ»:
