«Հրապարակ» օրաթերթը գրում է.
ՔՊ եռօրյա ներկուսակցական ընտրություններից հետո կանանց ցանկում 5-րդ ցուցանիշը գրանցած Լիլիթ Մակունցը վերջերս ընկերական շրջապատում անկեղծացել է, որ Նիկոլ Փաշինյանը հենց իրեն է տեսնում հաջորդ գումարման խորհրդարանի նախագահի դերում։
ԱՄՆ-ում ՀՀ նախկին դեսպան Մակունցը, որն իշխանափոխությունից առաջ Փաշինյանի անգլերենի ուսուցիչն է եղել, իսկ իշխանափոխությունից հետո «Իմ քայլը» խմբակցության քարտուղարն էր, աչքի է ընկնում մեղմ, բոլորի հետ լեզու գտնելու ունակությամբ։ Իհարկե, վատ չէ, որ իշխող թիմում նման վստահություն եւ ախորժակ ունեն, որ ընտրություններից հետո իրենք կրկին իշխանություն են լինելու, բայց հարցն այն է, որ եթե անգամ այդպես լինի, ապա Մակունցը չի ձգի այդ պաշտոնին, եւ քաղաքական խոսք ու ճկունություն ունեցող թեկնածու է պետք։
Ի դեպ, մյուս հավակնորդները՝ Հայկ Կոնջորյանն ու Ռուբեն Ռուբինյանը, ոչ միայն Մակունցից, այլ նաեւ գործող խոսնակ Ալեն Սիմոնյանից շատ ձայն են ստացել, սակայն դեռ ցուցակի կազմման երկրորդ փուլ կա, որտեղ առաջին 50 թեկնածուների շրջանակը նորից է քվեարկության դրվելու` արդեն տեղերի հերթականությունը որոշելու համար։
