Թրամփը Ծինփինի հետ քննարկել է Իրանի հետ կապված զարգացումները

ԱՄՆ նախագահ Դոնալդ Թրամփը հայտարարել է, որ ավարտել է «երկար և արդյունավետ» հեռախոսազրույցը Չինաստանի նախագահ Սի Ծինփինի հետ, որի ընթացքում քննարկվել են մի շարք կարևոր միջազգային և երկկողմ հարցեր։

Նախագահի խոսքով՝ զրույցի օրակարգում ընդգրկված են եղել առևտրային հարաբերությունները, ռազմական հարցերը, ապրիլին Չինաստան նախատեսվող իր այցը, Թայվանի շուրջ իրավիճակը, Ռուսաստանի և Ուկրաինայի միջև շարունակվող պատերազմը, ինչպես նաև Իրանի հետ կապված զարգացումները։

Քննարկվել են նաև Չինաստանի կողմից Միացյալ Նահանգներից նավթի և գազի գնումները, ինչպես նաև ամերիկյան գյուղատնտեսական արտադրանքի ներմուծման ընդլայնման հնարավորությունները։ Մասնավորապես, Թրամփը նշել է, որ Չինաստանը դիտարկում է ընթացիկ սեզոնում սոյայի գնումների ծավալը մինչև 20 միլիոն տոննա ավելացնելու հնարավորությունը, իսկ հաջորդ սեզոնի համար արդեն պարտավորվել է ձեռք բերել 25 միլիոն տոննա։ Զրույցի ընթացքում անդրադարձ է կատարվել նաև ինքնաթիռների շարժիչների մատակարարումներին և մի շարք այլ թեմաների։

Դոնալդ Թրամփի խոսքով՝ ԱՄՆ-Չինաստան հարաբերությունները, ինչպես նաև իր անձնական հարաբերությունները նախագահ Սի Ծինփինի հետ, գտնվում են բարձր մակարդակի վրա։ Նա ընդգծել է, որ երկու կողմերն էլ գիտակցում են այդ հարաբերությունների պահպանման կարևորությունը։

ԱՄՆ նախագահը վստահություն է հայտնել, որ իր նախագահության առաջիկա երեք տարիների ընթացքում Չինաստանի Ժողովրդական Հանրապետության հետ համագործակցության շրջանակում հնարավոր կլինի հասնել բազմաթիվ դրական արդյունքների։