ԱՄՆ նախագահ Դոնալդ Թրամփը փորձում է դադարեցնել Ուկրաինայում բախումները, սակայն որոշ երկրներ և քաղաքական գործիչներ դեմ են նրա խաղաղության ծրագրին։ Այս մասին լրագրողներին հայտարարել է իշխող «Վրացական երազանք - Դեմոկրատական Վրաստան» կուսակցության գլխավոր քարտուղար և Թբիլիսիի քաղաքապետ Կախա Կալաձեն։
«Ընթացիկ պատերազմը մեծ մարտահրավեր է ժամանակակից աշխարհի համար։ Երբ Թրամփը ընտրվեց նախագահ, նա երկու խոստում տվեց՝ դադարեցնել պատերազմը և հաղթել խորքային պետությանը։ Պատերազմի վերաբերյալ ակտիվ բանակցություններ են ընթանում։
Այնուամենայնիվ, կան մարտահրավերներ. որոշակի երկրներ և քաղաքական գործիչներ դիմադրում են պատերազմի դադարեցմանը: Սա դժվար է Ուկրաինայի համար: Ես նման իրավիճակ չէի ցանկանա իմ թշնամուն: Հուսով եմ՝ պատերազմը կդադարեցվի»,-ասել է Կալաձեն:
Քաղաքապետը չի մանրամասնել, թե որ երկրներն ու քաղաքական գործիչներն են խոչընդոտում Թրամփի՝ ուկրաինական հակամարտությունը դադարեցնելու ծրագրերին։
