Ատոմային էներգիայի միջազգային գործակալությունը (ԱԷՄԳ) կանոնավոր երկխոսություն է վարում Իրանի հետ, սակայն համագործակցության մակարդակը սահմանափակ է, ՌԻԱ Նովոստիին տված հարցազրույցում ասել է ԱԷՄԳ-ի գլխավոր տնօրեն Ռաֆայել Գրոսսին։
«Մենք սկսել ենք երկխոսություն Իրանի հետ։ Ես շատ կանոնավոր կապի մեջ եմ արտգործնախարարի և այլ պաշտոնյաների հետ, բայց համագործակցության մակարդակը մնում է սահմանափակ։ Սա է ներկայիս իրավիճակը», - ասել է Գրոսսին։
Նոյեմբերի 20-ին Ատոմային էներգիայի միջազգային գործակալության (ԱԷՄԳ) կառավարիչների խորհուրդը բանաձև ընդունեց, որով պահանջում էր, որ Իրանը անհապաղ գործակալությանը զեկուցի իր հարստացված ուրանի պաշարների և ապամոնտաժված միջուկային օբյեկտների վիճակի մասին։
Վիեննայում գտնվող միջազգային կազմակերպություններում Իրանի մշտական ներկայացուցիչ Ռեզա Նաջաֆին հայտարարել է, որ Թեհրանը ԱԷՄԳ-ի նոր բանաձևը համարում է ոչ կառուցողական և քաղաքականացված։
