ԱՄՆ նախագահի հատուկ դեսպանորդ Սթիվեն Ուիթքոֆը այս շաբաթավերջին Բեռլինում կհանդիպի եվրոպացի առաջնորդների և Վլադիմիր Զելենսկու հետ, հաղորդում է The Wall Street Journal-ը (WSJ)՝ հղում անելով իր աղբյուրներին։
Նրանց տեղեկությունների համաձայն՝ նա դեկտեմբերի 14-15-ը կհանդիպի Մեծ Բրիտանիայի, Գերմանիայի և Ֆրանսիայի բանակցողների հետ։ Ուիթքոֆին Բեռլին ուղարկելու որոշումը ցույց է տալիս ԱՄՆ վարչակազմի ցանկությունը՝ հաղթահարելու Վաշինգտոնի և Կիևի միջև առկա տարաձայնությունները խաղաղության համաձայնագրի պայմանների վերաբերյալ, կարծում է թերթը։
WSJ-ն գրում է, որ Բեռլինում կայանալիք բանակցություններին կմասնակցեն Ֆրանսիայի նախագահ Էմանուել Մակրոնը, Մեծ Բրիտանիայի վարչապետ Քիր Սթարմերը և Գերմանիայի կանցլեր Ֆրիդրիխ Մերցը, ինչպես նաև նրանց խորհրդականները։
Թրամփը նախկինում հայտարարել էր, որ ԱՄՆ-ն ներկայացուցիչ կուղարկի Եվրոպա կայանալիք հանդիպմանը միայն այն դեպքում, եթե Վաշինգտոնը հասկանա, որ այդ բանակցությունները արդյունավետ կլինեն։
