WhatsApp-ը կսկսի զգուշացնել օգտատերերին, եթե փորձ արվի անհայտ կոնտակտի հետ տեսազանգի ընթացքում կիսվել իրենց էկրանով։ Նմանատիպ անվտանգության մեխանիզմ կներդրվի նաև Facebook Messenger-ում, հաղորդում է 9to5Mac-ը։
Այս նոր գործառույթը նպատակ ունի կանխել տարածված խաբեությունը, որի դեպքում հարձակվողները ներկայանում են որպես բանկերի, ավիաընկերությունների և այլ կազմակերպությունների հաճախորդների սպասարկման ներկայացուցիչներ։ Նրանք ստեղծում են կեղծ ապրանքանիշերի էջեր, շփվում են ընկերությունների պաշտոնական էջերում մեկնաբանություններ թողած օգտատերերի հետ և, օգնության քողի տակ, համոզում նրանց կիսվել իրենց էկրանով։
Այս պրակտիկան թույլ է տալիս խաբեբաներին մուտք գործել զգայուն տվյալների, այդ թվում՝ օգտանունների և ստուգման կոդերի, որոնք կարող են օգտագործվել գաղտնաբառերը փոխելու կամ առցանց ծառայություններ մուտք գործելու համար։
Meta-ն պարզաբանեց, որ եթե հայտնաբերի կասկածելի գործունեություն, իր արհեստական բանականությունը կտեղեկացնի օգտատիրոջը հնարավոր խարդախության սխեմայի մասին և կառաջարկի պաշտպանության տարբերակներ, ինչպիսիք են կասկածելի հաշվի արգելափակումը և բողոք ներկայացնելը։
Ընկերությունը հիշեցրել է օգտատերերին զգույշ լինել անծանոթների հետ շփվելիս։ Օգտատերերին խորհուրդ է տրվում չկիսվել անձնական կամ ֆինանսական տեղեկություններով, չսեղմել երրորդ կողմի հղումների վրա և խնդիրները լուծել բացառապես պաշտոնական աջակցության միջոցով: Հատկապես նշվում է, որ անհապաղ գործելու կամ զրույցը գաղտնի պահելու մշտական խնդրանքները պետք է ընդունվեն որպես հնարավոր խարդախության նշան:
Թարգմանությունը՝ Euromedia24.com-ի
