ԱՊՀ երկրների ղեկավարները հոկտեմբերի 10-ին Դուշանբեում կայանալիք գագաթնաժողովում կքննարկեն տարածաշրջանային և գլոբալ անվտանգության հարցեր, հայտնում է Տաջիկստանի արտաքին գործերի նախարարության մամուլի ծառայությունը։
Հայտարարության համաձայն՝ Համագործակցության երկրների ղեկավարները կքննարկեն «միջազգային օրակարգի արդիական հարցեր, այդ թվում՝ տարածաշրջանային և համաշխարհային անվտանգությունը»։ Գագաթնաժողովը կկայանա Ազգի պալատում և կնախագահի Տաջիկստանի նախագահ Էմոմալի Ռահմոնը։
Բացի այդ, հատուկ ուշադրություն կդարձվի քաղաքական երկխոսության հետագա խորացմանը, առևտրատնտեսական կապերի ամրապնդմանը, ինչպես նաև Համագործակցության շրջանակներում մարդասիրական և մշակութային ոլորտներում համագործակցության ընդլայնմանը։
Հանդիպումից հետո առաջնորդները կստորագրեն մի շարք փաստաթղթեր, «որոնք ուղղված են բազմակողմ ձևաչափով փոխշահավետ համագործակցության հետագա ամրապնդմանը», ասվում է հայտարարության մեջ։
