Մեծ Բրիտանիան և Եվրոպան քննարկում են ՄԱԿ-ի Անվտանգության խորհրդի կողմից Թեհրանի դեմ պատժամիջոցների վերականգնման հնարավորությունը` կապված նրա միջուկային ծրագրի հետ, հայտարարել է Մեծ Բրիտանիայի վարչապետ Քիր Սթարմերը։
«Դա հնարավորություն է, որը քննարկվում է դաշնակիցների կողմից։ Ես կարծում եմ, որ պատժամիջոցները պետք է լինեն Իրանի վրա ճնշման մի մասը», - խորհրդարանում ասել է Սթարմերը՝ պատասխանելով պատգամավորի հարցին այն մասին, թե արդյոք Լոնդոնը և Բրյուսելը պետք է վերականգնեն ՄԱԿ-ի պատժամիջոցները՝ ենթադրյալ «իրանական սպառնալիքի» և Թեհրանի միջուկային ծրագրի ֆոնին։
2015 թվականին Մեծ Բրիտանիան, Գերմանիան, Չինաստանը, Ռուսաստանը, ԱՄՆ-ը, Ֆրանսիան և Իրանը կնքեցին միջուկային համաձայնագիր, որը նախատեսում էր պատժամիջոցների վերացում՝ Իսլամական Հանրապետության միջուկային ծրագրի սահմանափակման դիմաց։
Թրամփի նախորդ նախագահության օրոք Միացյալ Նահանգները 2018 թվականի մայիսին դուրս եկավ Համատեղ գործողությունների համապարփակ ծրագրից և վերականգնեց Թեհրանի դեմ պատժամիջոցները։ Ի պատասխան՝ Իրանը հայտարարեց համաձայնագրով ստանձնած իր պարտավորությունների աստիճանական կրճատման մասին՝ հրաժարվելով, մասնավորապես, միջուկային հետազոտությունների և ուրանի հարստացման մակարդակի սահմանափակումներից։
