Սպիտակ տունը հրամայել է դադարեցնել Իրանի դեմ նոր պատժամիջոցների կիրառումը։ Այս մասին կիրակի օրը գրել է «Wall Street Journal»-ը՝ հղում անելով իր աղբյուրներին։Նրանց տեղեկությունների համաձայն՝ անցյալ շաբաթ Սպիտակ տան մամուլի քարտուղար Քերոլայն Լիվիտը հրահանգ է ուղարկել Պետդեպարտամենտին, Ֆինանսների նախարարությանը և Ազգային անվտանգության խորհրդին, որով պահանջել է «դադարեցնել Իրանի նկատմամբ նոր պատժամիջոցներ կիրառելու բոլոր գործունեությունը»։
Արդյունքում, ԱՄՆ նախագահ Դոնալդ Թրամփի՝ Իսլամական Հանրապետության վրա «առավելագույն ճնշում» գործադրելու արշավը փաստացի կանգ է առել։
Լիվիտի տեղակալ Աննա Քելլին հրատարակության համար տված իր մեկնաբանության մեջ ուղղակիորեն չի հերքել այս տեղեկատվությունը, սակայն նշել է, որ «պատժամիջոցների հարցի վերաբերյալ ցանկացած նոր որոշում կհայտարարվի կամ Սպիտակ տան, կամ համապատասխան գերատեսչությունների կողմից»։
Վերջին անգամ Վաշինգտոնը Թեհրանի դեմ սահմանափակումներ է կիրառել մայիսի 21-ին, և այդ ժամանակից ի վեր Ֆինանսների նախարարությունը նոր պատժամիջոցների մասին հայտարարությունն առնվազն երկու անգամ հետաձգել է, նշում է թերթը։
