Դանիան Ուկրաինային կտրամադրի իր քսանհինգերորդ օգնության փաթեթը՝ 6,7 միլիարդ կրոն (970 միլիոն դոլար) արժողությամբ 2025-2027 թվականների համար: Այս մասին հաղորդվում է թագավորության պաշտպանության նախարարության մամուլի հաղորդագրության մեջ։
Նշվում է, որ այդ գումարը կուղղվի հակաօդային պաշտպանության տեխնիկա, հրետանի ձեռք բերելու և Ուկրաինայի ռազմաօդային ուժերին աջակցելու համար։
«Նվիրատվությունների 25-րդ փաթեթով մենք ընդգծում ենք մեր աջակցությունը Ուկրաինային ինչպես կարճաժամկետ, այնպես էլ երկարաժամկետ հեռանկարում»,-ասվում է պաշտպանության նախարար Թրոելս Լունդ Պոուլսենի մամուլի հաղորդագրության մեջ։
Արտաքին գործերի նախարար Լարս Լոկե Ռասմուսենը հույս է հայտնել, որ Դանիայի օգնությունը «կարող է ոգեշնչել մյուս դաշնակիցներին էլ ավելի մեծ աջակցություն ցուցաբերելու», քանի որ «Ուկրաինայի անվտանգությունը վճռորոշ է ողջ Եվրոպայի ապագայի համար»։
