Գյումրիի նախկին քաղաքապետ, մարտի 30-ին Գյումրիում կայանալիք ավագանու արտահերթ ընտրություններին Հայաստանի կոմունիստական կուսակցության նախընտրական ցուցակի առաջին համարով մասնակցող Վարդան Ղուկասյանը դիմում է ցանկացած քայլի՝ ընտրություններին ընդառաջ աչքի ընկնելու և իր վարկանիշը բարձրացնելու համար: Մի քանի օր առաջ նա Ֆեյսբուքի իր էջում հրապարակել է ռուս զինվորականների ու վետերանների հետ իր լուսանկարները՝ գրելով, որ այդ լուսանկարներն արվել են 2010 թվականին Գյումրիում «Պատվո բլուր» հուշահամալիրի բացման արարողության ժամանակ:
Իրականում դրանք «Պատվո բլուր»-ի բացման օրն արված լուսանկարներ չեն, քանի որ այնտեղ Վարդան Ղուկասյանից և իրեն ուղեկցող մի քանի հոգուց բացի՝ այլ մարդ չկա, և հետևաբար՝ Վարդան Ղուկասյանը ներկա չի եղել այդ արարողությանը: Մինչդեռ Գյումրիում Հայ-ռուսական բարեկամությունը խորհրդանշող «Պատվո բլուր» («Холм Чести») հուշահամալիրի՝ 2010 թ. օգոստոսի 20-ին տեղի ունեցած բացման պաշտոնական արարողությանը մասնակցել են Հայաստանի Հանրապետության այն ժամանակվա նախագահ Սերժ Սարգսյանը և Ռուսաստանի Դաշնության այն ժամանակվա նախագահ Դմիտրի Մեդվեդևը
Իսկ Գյումրիի այն ժամանակվա քաղաքապետ Վարդան Ղուկասյանը, ինչպես ցույց են տալիս արխիվային տեսանյութերը, ՌԴ արտակարգ և լիազոր դեսպան Վյաչեսլավ Կովալենկոյի, Ռուսաստանի նախագահի աշխատակազմի ներկայացուցիչ Յուրի Մուրադովի, «Պատվի գործ» հայ-ռուսական բարեգործական կազմակերպության համանախագահներ Վիկտոր Կրիվոպուսկովի ու Անդրանիկ Նիկողոսյանի հետ միասին մասնակցել է դրանից մեկ տարի անց՝ 2011 թ. սեպտեմբերի 1-ին, տեղի ունեցած մեկ այլ միջոցառման՝ «Պատվո բլուր» հուշահամալիրի հուշատախտակների բացման արարողությանը:
Տարօրինակ է, որ կյանքի նման փորձ ունեցող, Աստծուց և ճշմարտությունից հաճախ խոսող Վարդան Ղուկասյանն իր նախընտրական քարոզարշավը կառուցում է բացահայտ կեղծիքի վրա:
Հիշեցնենք, որ Վարդան Ղուկասյանը Գյումրիի քաղաքապետ է եղել 2000-2012 թթ.:
Տեղեկանք. «Պատվո բլուր» հուշահամալիրում ամփոփված են 1855թ. ռուս-թուրքական պատերազմի ժամանակ զոհված ռուս զինվորականների մասունքները: Անցած տասնամյակներում բարձիթողի վիճակում գտնվելուց հետո, 2009թ. Շիրակի եւ ՌԴ Ուլյանովսկի մարզերի իշխանությունների նախաձեռնությամբ և հայ-ռուսական բարեգործական «Պատվի գործ» կազմակերպության համատեղ ջանքերով, այս տարածքում իրականացվել են բարեկարգման և վերակառուցման աշխատանքներ, կառուցվել է ռուս սպաների հիշատակը հավերժացնող հուշարձան:
