Լեհաստանի վարչապետ Դոնալդ Տուսկը, ի պատասխան ԱՄՆ-ի՝ Եվրամիության ապրանքների համար 25 տոկոս մաքսատուրքերի սահմանման, ասել է, որ ԵՄ-ն ստեղծված չէ Միացյալ Նահանգների առավելություններից օգտվելու համար։
«Եվրամիությունը չի ստեղծվել ինչ-որ մեկից օգուտ քաղելու համար: Ընդհակառակը: Այն ստեղծվել է խաղաղություն պահպանելու, մեր երկրների միջև հարգանքը պահպանելու, ազատ և արդար առևտուր ստեղծելու և մեր անդրատլանտյան բարեկամությունն ամրապնդելու համար: Դա պարզ է», - գրել է Տուսկը X-ում:
Նախօրեին ԱՄՆ նախագահ Դոնալդ Թրամփը Վաշինգտոնում իր կաբինետի առաջին նիստում հայտարարեց, որ ԵՄ-ից ապրանքների համար մաքսատուրքեր մտցնելու որոշումն արդեն կայացվել է և շուտով կհայտարարվի, որ դրանք կհասնեն 25%-ի և կանդրադառնան ոչ միայն մեքենաներին, այլև «ամեն ինչին»:
Միաժամանակ Թրամփը կարծիք է հայտնել, որ ԵՄ-ն ստեղծվել է ԱՄՆ-ին իր շահերից ելնելով օգտագործելու համար։
