Զապորոժիեի ատոմակայանի (ZNPP) տարածքում նկատվում է ռազմական ակտիվություն, ներառյալ անօդաչու սարքերի օգտագործումը, ինչը բարդացնում է Ատոմային էներգիայի միջազգային գործակալության (ՄԱԳԱՏԷ) փորձագետների ռոտացիան։ Այս մասին հայտարարել է ՄԱԳԱՏԷ-ի գլխավոր տնօրեն Ռաֆայել Գրոսսին՝ նշելով, որ նման ակտիվության պատճառի մասին հարցը պետք է ուղղել զինվորականներին։
«Վերջերս մենք տեսանք մեծ ռազմական ակտիվություն, հատկապես անօդաչու թռչող սարքերի կիրառում կայանի մերձակայքում»,- ասել է նա Տոկիոյում կայացած մամուլի ասուլիսում։
«Ես չէի մանրամասնի, թե ինչու է դա տեղի ունենում, գուցե սա զինվորականների հարցն է։
Օրինակ, մեր փորձագետների ռոտացիան երկար ժամանակ ձգձգվում է, քանի որ դժվար է հասնել լռության, որպեսզի թիմերն ապահով անցնեն»,- հավելել է Գրոսսին։
ՄԱԳԱՏԷ-ի գլխավոր տնօրենը նշել է, որ իր գործակալությունը ակտիվորեն անդրադառնում է այս խնդրին։ Մասնավորապես, Գրոսսին այդ հարցը քննարկել է Վլադիմիր Զելենսկիի հետ Մյունխենի անվտանգության համաժողովի շրջանակներում, ինչպես նաև այցելել է Մոսկվա։
