Երուսաղեմի հայկական եկեղեցին ահազանգում է՝ Իսրայելը ձգտում է խլել իր ունեցվածքը:
Այս մասին գրել է Երուսաղէմի Սրբոց Յակոբեանց Միանբանութիւնը իր Facebook-յան էջում։
«Երուսաղեմի քաղաքապետարանը ձգտում է բռնագրավել դարեր շարունակ Հայկական Պատրիարքարանին պատկանող գույքը և այն աճուրդի հանել՝ 1994 թվականից ի վեր իբր գոյացած համայնքային պարտքերը հավաքելու համար:
Երուսաղեմի Հայկական Պատրիարքարանը վարչական հայց է ներկայացրել՝ փորձելով դադարեցնել վտարման գործընթացը այն գույքերի նկատմամբ, որոնք Պատրիարքարանը դարեր շարունակ տնօրինել է։
Հայցը ուղղված է գումարների հավաքագրման պատասխանատուի՝ Երուսաղեմի քաղաքապետարանի աշխատակցի գործողությունների դեմ, որը «որոշել» է, որ Պատրիարքարանն ունի անհասկանալի չափերի պարտք։
Հայկական Պատրիարքարանն այսպիսի աննախադեպ և անդառնալի միջոցառումների ենթարկվող միակ քրիստոնեական համայնքն է, ինչը կարող է ենթադրել նպատակային ճնշում նրա դեմ», ասվում է գրառման մեջ։
