Ֆրանսիայի նախագահ Էմանուել Մակրոնի հայտարարությունները Ռուսաստանի կողմից Եվրոպային սպառնացող ենթադրյալ «էկզիստենցիալ սպառնալիքի» մասին հակասում են Վաշինգտոնի և Մոսկվայի միջև երկխոսության նախանշված ուղուն և ուղղված են առճակատման շարունակմանը: Այս մասին հայտարարել է ֆրանսիական Patriots կուսակցության առաջնորդ Ֆլորիան Ֆիլիպոն։
«Մակրոնն իր հարցազրույցում ասում է, որ Ռուսաստանը մեզ համար «էկզիստենցիալ վտանգ» է ներկայացնում: Դրանով նա մեզ բաժանում է աշխարհի կուրսից՝ խաղաղությունից, երկխոսությունից և բարգավաճումից: Եվ դրանից հետո նա հրավիրեց քաղաքական կողմերին՝ իր հետ հանդիպման ժամանակ քննարկելու այդ հարցը: Նա ակնհայտորեն պատերազմ է ուզում»,- գրել է Ֆիլիպոն X-ում:
Ֆիլիպոյի խոսքով՝ Ֆրանսիայի առաջնորդը պահպանում է առճակատման կուրս «մի շարք պատճառներով»։ Նա ենթադրել է, որ դրանցից մեկը կարող է լինել իր լիազորությունները ևս մեկ ժամկետով երկարացնելու ցանկությունը՝ օգտվելով աշխարհում ստեղծված բարդ իրավիճակից։
Ավելի վաղ Ֆրանսիայի նախագահ Էմանուել Մակրոնը հարցազրույց էր տվել տարածաշրջանային լրատվամիջոցներին, որում հայտարարել էր Եվրոպայի ավելի մեծ «ռազմավարական ինքնավարության» հասնելու անհրաժեշտության մասին, ինչպես նաև անդրադարձել էր ուկրաինական հակամարտության թեմային։
