Քաղաքային իշխանությունը՝ կոալիցիոն երկյակով, այլևս հավատ չի ներշնչում, անհրաժեշտ է հասնել ավագանու արտահերթ ընտրությունների։ Այս մասին իր ֆեյսբուքյան էջում գրել է «Դեմոկրատական այլընտրանք» կուսակցության նախագահ Սուրեն Սուրենյանցը․
«Քաղաքական լուծումը՝ Երևանի ավագանու նոր ընտրություններ։ Մարզերից Երևան եկող ավտոբուսներն այսուհետ երթը կավարտեն ավտոկայարաններում, Երևանով չեն երթևեկի: Նշված ավտոբուսների մուտքը մայրաքաղաք կսահմանափակվի։
Կարծես, քաղաքապետարանը նման նախաձեռնությամբ է հանդես եկել, իսկ սա նշանակում է՝ տրանսպորտի թանկացումն իրենց մաշկի վրա ավելի շատ զգալու է մարզերի բնակչությունը, առնվազն ամեն օր Երևան գործի կամ դասի եկող մարդիկ:
Երբ իշխանությունները տեղի տվեցին հասարակության ճնշմանը ու 150 դրամի փոխզիջմանը գնացին, ակնհայտ էր, որ ժողովրդի գրպանը մտնելու այլ մեխանիզմներ են մշակելու:Քաղաքային այս իշխանությունը՝ կոալիցիոն երկյակով, այլևս հավատ չի ներշնչում ու անհրաժեշտ է հասնել մի իրավիճակի, երբ ընդդիմադիր ուժերի կոնսենսուսը դառնա Երևանի ավագանու արտահերթ ընտրությունների պահանջը:
Սա է քաղաքական լուծումը, մնացած պարագաներում՝ պատճառը թողած, ստիպված ենք լինելու պայքարել հետևանքների դեմ»,-գրել է նա։
