Հենրիխ Դանիելյանը ֆեյսբուքյան իր էջում գրել է․
«Լսեցի ՔՊ պատգամավոր Վահագն Ալեքսանյանի տեսանյութը, որտեղ նա բացահայտորեն խոստովանում է, որ առողջապահության ոլորտում կոռուպցիոն սխեմաներ են գործում. հիվանդանոցներում պետպատվերով բուժման իրավունք ունեցող քաղաքացիներին խաբում են, նրանց հասանելիք պետպատվերը յուրացնում են, և բժիշկներն ու հիվանդանոցների ղեկավարները քաղաքացիներից անօրինական գումարներ են կորզում։
Եթե սա ճշմարտություն է, ապա ինչո՞ւ առողջապահության նախարարը դեռ ազատության մեջ է։ Ինչո՞ւ որևէ քրեական գործ հարուցված չէ։ Ինչո՞ւ իշխանությունը չի ձերբակալում այդ կոռումպացված պաշտոնյաներին։ Պատասխանը պարզ է՝ քանի որ կոռուպցիան համակարգային է, այն գործում է բուրգաձև սխեմայով՝ ուղղակիորեն ղեկավարող վերնախավի հովանու ներքո։ Իսկ Ալեքսանյանի նման իշխանական խոսնակները փորձում են հերթական անգամ ձեւացնել, թե իրենք «նաև ժողովրդի կողքին են»՝ իրականում թաքցնելով սեփական համակարգի հանցագործությունները։
Ինչ է նշանակում՝ «ժողովուրդ ջան, զգույշ եղեք, որ ձեզանից պետպատվերի գումար չկորզեն»։ Այսինքն դուք գիտեք, որ ձեր նշանակած պաշտոնյաները գողանում են, բայց ոչ թե ձերբակալում եք նրանց, այլ ժողովրդին ասում եք՝ «դուք զգույշ եղեք»։ Եթե ձեր իշխանությունը չի պատժում կոռուպցիոներներին, ուրեմն դուք այդ համակարգի մասն եք, և այդ կոռուպցիան բխում է հենց ձեր իշխանությունից։
Ժողովուրդը պաշտպանված կլինի ոչ թե այն դեպքում, երբ իշխանության ներկայացուցիչները «զգուշացումներ» կանեն, այլ այն ժամանակ, երբ դուք այլևս իշխանություն չեք լինի։ Քանի դեռ կոռումպացված նախարարները, մարզպետները, պաշտոնյաները ազատ շրջում են, դուք որևէ բարեփոխում իրականացնելու իրավունք չունեք»։
